>(مضيت في دروب الحب كني غريبة)< ...... روايه روعه

07-25-2008, 03:52 AM

>(مضيت في دروب الحب كني غريبة)<

مقدمة بسيطة

مضيت دروب الحب كني غريبة
ولا ادري وين قلبي موديني
تعبت وصرت فيه والله غريقة
ونهاية دربي كتبتها بيديني

في هالقصة بتشوفون التضحية والحب الحقيقي بتشوفون كيف اللي يحب من قلب بيضحي لاجل اللي يحبة بتشوفون تحكم الاهل وسيطرتهم الين بتوصل بتشوفون الانسانية والشر والخير وانهم مايلتقون في طريق واحد ابدوالحقد والكره يعني كل شئ بيتجسد في قصتي المتواضعة وابطال القصة بتتعرفون عليهم تدريجيا يعني كل ماصار شئ وظهر لنا شخص بعرفكم علية لان فية ناس بتستمر للنهاية وناس بتختفي وناس بتظهر بالمنتصف ويمكن تاثر وناس يمكن تظهر وتختفي فعلشان كذا فضلت اني اكتب القصة وبالتدريج نتعرف على شخصياتها

الجزء الاول

في العاصمة الرياض وبالتحديد يوم الاثنين في بيت عيلة ابو حمد نايف العتيبي وكالعادة مثل كل صباح تروح الام نورة ام حمد تقوم عيالها للمدرسة تدخل الام غرفة بنتها ريم خلني اعرفكم عليها (ريم هذي بنت حبوبة جدا طيبة دمها خفيف مافي احد مايحبها تمتلك القلوب بسرعة عمرها 19 سنة تدرس اخر سنة ثالث ثانوي علمي طموحها تدخل طب اطفال وذي امنيتها من الصغر تسعى لتحقيقها وحيل حساسة هالبنت وبسبةحساسيتها تحس الناس كلهم يكرهونها تحب الحب وتعيش للحب)
ام حمد::يمة ريم قومي الساعة 5 والسواق ينتظر تحت
ريم::اممممممم يمة بس خمس دقايق تكفين
ام حمد::يوم اقولك خليك من السهر ونامي تقولين بقوم ماعليك يالله قومي بعدين حرام عليك كل يوم السواق ينطق تحت بسبتك
ريم ومن تحت اللحاف::اية يمة ذالحين اقوم وبعدين خلية ينطق شوي مو ياخذ راتب خلية يستاهل كلي يوم يطقني الظهر
ام حمد::وش هالكلام ياريم حرام عليك الرجال جاي يترزق الله وانتي تقولين كذا وتشد ام حمد اللحاف من على ريم وتنقز ريم من قو الشد لانها كانت ماسكتة في يدها
ريم::ياحووووووووووووول يعني كل يوم مدرسة مدرسة وقومة صبح اااه بس متى ارتاح من المدرسة والدراسة متى يقولون ريم تعالي خوذي نتيجتك ولاتورينا وجهك والله بسوي حفلة وقتها متى بس
ام حمد::ان شاءالله يجي هاليوم بس انتي شدي حيلك لاتنسين انك ثالث يعني اخر سنة وبعدين ماباقي غير شهر على الامتحانات ابيك ترفعين راسي مثل كل سنة
ريم::زين اذيتونا كل يوم والثاني انتي ثالث وانتي ثالث ترا وربي طفشت ومليت وتقووم من فراشها تروح لحمامها وتبي تدخل الا هو مقفل تطق الباب
ترد مريم من جوا الحمام::نعم
(اعرفكم عليها هذي مريم اخت ريم الصغيرة واخر العنقوود والدلوعة عمرها 11 سنة وتدرس في خامس ابتدائي)
ريم::وانتي بالله ماعندك غرفة وفيها حمام وش عندك رازة هالوجه بحمامي يوميا
مريم::ياختي كيفي اروح أي حمام بالبيت
تروح ريم للحمام اللي بالصالة الا محمد اخوها في الحمام
(محمد اخو ريم اصغر منها ب6 سنوات هو بسادس وعمرة 12 سنة)
تطق ريم الباب::محمدوووة وصمخ يالله خلصني اطلع بسرعة ماصارت طفشتني وانت ناقع صارلك ساعة بالحمام وراي عفسة وكريموة بيااذينا بزامورة
محمد من جوا الحمام::اقول انطقي واستني شوي بعدين ليه ماتروحين حمامك؟
ريم::يوووه والله انك فاضي تناقش على هالصبح حمامي فية الاخت مريم تتحمم وبعدين يعني ماتبي تطلع وتتكتف ريم قدام الحمام
محمد وهوطالع::انتي ليه دووم معصبة خلك ايزي ياعزيزي واعط الدنيا بطاقة فيزي ويمشي من جنبها يغني ويرقص ويمد لسانة لها كل شوي
ريم وهي معصبة::وانت لك ارض تغني بهالصبح اية ماوراك مس كعبول والا ماغنيت
محمد::بالله احد يشوف وجهك ومايغني مهبول هذا وبعدين على طاري كعبول وش اخبارها حية ميتة من بعد عمايلك انتي وشلتك
ريم وهي تدخل الحمام::ذي بسبعة ارواح ماينفع معاها شئ ابد
وتصك الباب بقوة خلا كل اللي في البيت ينزون وابوها قام مفزوع من نومة وراح يركض الصالة
ابو حمد:خير ان شاءالله وش فية ووش اللي انفجر
(ابو حمد هذا عندة شركة مقاولات كبيرة يشتغل فيها وهو حيل طيب وحبوب يحب مرتة وعيالة عندة بالدنياعيالة اربعة هم حمد وريم ومحمد ومريم ابو حمد ابوة متوفي وعندة اخوان من ابوة بس علاقتة هو اولادة فيهم سطحية بالاعياد بس وبالمناسبات وامة حية وعندة اخت منها اسمها مها تدرس في الجامعة سنة ثالثة علم نفس)
مريم وهي مطلعة راسها من باب غرفتها وحاطة البشكير على راسها::ماصاير شئ باباتي بس انت خابر بنتك الشيخة ريم ودفاشتها
ريموهي طالعة من الحمام وتتكلم باستهزاء: تكفين يالناعمة انتي اقول مالدفش غيرك
مريم::يحصلك تصيرين ربع مرايم انا الليدي مريم كان ماتدرين صح باباتي
ابو حمد::صح ونص بعد
ريم وهي مادة بوزها وتسوي نفسها زعلانة::اية اية دافع عن حبية القلب مريوم وانا ياحافظ لك الله اهي اهي وهي تمثل انها تبكي وينك ياحمد وينك ياقلب وروح اختك ماحد يحبني في البيت غيرك وينك
ابو حمد:: بسم الله علينا انتي ريم وش فيك تقول عجوز ماكلين عشاها وبعدين اذيتينا بهالاسطوانة اليومية وانا كلكم احبكم وكلكم عيالي وانتي الريامي الغالية ريم الفلا
ريم من يوم ناداها الريامي انبسطت وابتسامتها شقت الحلق لانها تحب الناس ينادونها بالاسم هذا وتروح عند ابوها تضمة وتحب راسة::يعلني ماخلا منك يالغالي
ابوحمد::ولامنك يالله روحي البسي لاتتاخرين
مريم غارت من الحركة وراحت وجابت مشطها وتروح عند ابوها اللي كان جالس بالصالة وتضمة وتحب راسة وتجلس في حضنة::باباتي باباتي مشطلي شعري
ابو حمد::ياروح باباتي انتي تامرين امر كم مرايمعمدي انا الا هي وحدة وبحضني ويقعد ابو حمد يسرح شعرها ولانة ناعم وقصير فمااخذ من وقت
ريم في هالوقت جلست تلبس وتتجهز وهي قدام المراية جالسة تربط شعرها ذيل الفرس لان شعرها طويل حيل يوصل الى نص فخذها ومرة ناعم لونة الطبيعي بني فاتح وكان خيال عليها وهي تناظر في المراية دار هالكلام في بالها>فديت هالجمال والله يعلني ماخلا من نفسي وهي تبتسم<(ريم جميلة جدا يعني لازم اللي يشوفها تشدة غصب وين ماتروح تغطي على الكل بيضاء طولها مناسب عيونها كباروعسليات الرموش حيل كثيفة والحاجب خط على العين كانة مرسوم رسم خشمها صغير شوي بس كانة حد سيف مناسب جدا مع وجهها والفم كانة حبة عنب من صغرة وحلاوتة وجسمها متناسق تمااما يعني مليان شوي بس حلو وفوق كل هذا هي معجبة بنفسها حيل وعزتها كبيرة جدا)
مريم::ريموة ريموووة
ريم تنتبة وتنز وتطيح علبة الواقي من يدها::بسم الله علينا وش هالدفاشة خرعتيني
مريم::ههههه الا اقول البس أي بوت العنابي والا الابيض والا اقولك العنابي علي احلا ومناسب لي
ريم تطالع مريم بتعجب منها::الحمدالله والشكر خبلة لاصارك مقررة ليه تسالين وبعدين الالوان مي ممنوعة عندكم؟؟
مريم::لا ياستي يخسون يمنعونهم
الا شوي يسمعون صوت زامور كريم
ريم::يالله مريم الحين كريم بيغثنا من الصبح ويفتح لنا محاظرة بالهندي عاد افهمي اذا تفهمين
ينزلن البنات ويركبن السيارة وكالعادة فتح لهم كريم اسطوانة صباح الخير على قولة لو اخر انا مرة ثاني انا مافي ودي انتي مرة ثاني والا مافي يجي ظهر وريم ومريم سادات اذانهم وتحركت السيارة طبعن في هالوقت محمد سا اذانة ونايم بسابع نوومة قدام عند كريم
وفي الطريق
ريم::كريموة كريموة شغل المسجل على الاف ام الحين برنامج خديجة الوعل خلني اصبح على صوتها فديتها
كريم::ناهي ليش انتا في اخر انا مافي شغل
ريم::اقول شغل لااعلم بابا عليك
كريم::الم بابا انا مافي مشكل
ريم::انا مافي علم بابا كبير انا في علم بابا حمد عليك
كريم::لا كلاص انا في شغل ويشغل كريم الراديو وهو يتحرطم عليهم كم كلمة بالهندي وريم ومريم ناقعات من الضحك علية
وقفت السيارة عند اشارة وكانت ريم لاصقة في الشباك وسرحانة ووقفت عندهم سيارة بي ام دبليو والا فيها ولد يزبط بشماغة وكل شوي يناظر في ساعتة وعاد ريم عندها فضول تبي تشوف وش يسوي متنحة في واللي ساعدها ان سيارتهم مكتومة يعني ماحد يشوفها وشوي الا يصد ويطالع مع الشباك بيشوف الاشارة وصار ابد مقابل ربم طبعن هو مايشوفها بس البنت متنحة فية وريم من شافتة جا يغمى عليها من جمالة
ريم::ااااه ياقلبي وترمي بنفسة بقوة على الكرسي
مريم وبفزع::خير وش فية من مات
ريم انتبهت على حالها::انتي على طول من مات مافي شئ بس تذكرت شغلة
مريم::الحمدالله والشكر خبلة
ريم::اقول مالخبل غيرك
وكملو دربهم ووصلو لمدرسة ريم ونزلوها ودخلت المدرسة ووهي تشلح بعباتها وجالسة ترتبها وبالها مو معاها مع الولد اللي شافتة تحسة مو غريب عليها
نورة تجي من بعيد::هلا والله بالريامي فديت هالطلة
ريم::........ ماردت عليها لانها مانتبهت ببالها مو معها
ونورة وهي تصير قدام ريم وتاشر عليها::هية نحن هنا ياعالم ياناس ياخلق ريم اكلمك من الصبح وش فيك
ريم::هاه هلا والله اسفة مانتبهت عليك
نورة وبنغزة::اللي ماخذ عقلك يتهنا فية
ريم وبشوية انفعال::وش هالكلام نورة انتي تعرفيني زين قال ماخذ عقلي وماماخذ عقلي
نورة وهي مستغربة من اسلوب نورة::هدي يابنت الحلال ماقلنا شئ كلتيني بقشوري اقول امشي للفصل قبل ماتجي كعبول
((هذي نورة من شلة ريم الكبيرة بس علاقة ريم فيها مو قوية حيل))
ويروحن للفصل وتدخل ريم الفصل بهدوء على غير العادة يعني لاسلام ولا صجة زي كل يوم وتحط شنطتها على كرسيها اللي كان جنب الجدار وبجنبها صديقة طفولتها ونصفها الثاني سارة استغربت سارة من ريم ومن تصرفها جت وقربت منها
سارة وهي تهز كتف ريم::ريم ريم
ريم:.....
سارة وبصوت عالي::الريـــــــامي
ريم وتنز من مكانها الشئ اللي خلاها تطيح الطاولة::هلا اية وشو وش صاير
سارة::وش فيك من الصبح وانا اناديك لية ماتردين
ريم::مدري والله وش فيني
سارة ::خيروش فية خوفتيني
ريم::بعدين بقولك مووقتة الحين الا صح يالدبة ليه اتصل فيك امس ماتردين علي لا على الجوال ولا على البيت
سارة::اية امس والله امس انا فرحانة جا نواف من السفر وطول امس وانا عندة والجوال بغرفتي
ريم::نواف جا الله يعينك علية اكيد غثك امس بطلباتة اللي ماتخلص
(ريم ماتحب نواف من يوم وهي صغيرة والسبب هو لانه من صغرها وهو بس يغايضها ومهاوش الا الان كل ماشافو بعض)
سارة::حرام عليك والله انة طيب وحبوب
ريم::اية هين طيب وحبوب الا شر العالم كل فية تدرين سارة اليوم شفت واحد وانا جاية في الطريق يطيح الطير من السماء حلو مرة بس مادري لية من شفتة وانا احس اني اعرفة شكلة مو غريب
سارة وهي تبي تغايض ريم::الا ريم من متى ماشفتي نواف
ريم:: وععع وش هالسؤال
سارة ::انتي جاوبي وبس
ريم::من قبل سنتين يعني من يوم سافر ايام اول ثانوي
سارة::تجل لوتشوفينة الحين تنجنين علية فديتة محلو زيادة احلى من اللي شفتية
ريم::نالت على هالنواف اقول ((بس ريم ماتقدر تنكر ان نواف حلو وكل بنات عماتة وخالاتة ميتين علية وحتى بنات المدرسة))
ومضى اليوم بالمدرسة عادي وفي نهاية الدوام
سارة:: اقول ريم
ريم:: هلا ياقلبي
سارة::فديت قلبك الغالي..اسمعي يوم الاربعاء عندنا عزيمة علشان ردة نواف عاد ابيك تجين مع اهلك مو مثل كل سنة نسوي لة عزيمة وحضرتك ماتجين حتى امي منزعجة
ريم::افكر
سارة::لا سنو تفكرين تكفين
ريم::اجي بس بشرط
سارة::تامرين امر انتي
ريم::مايامر عليك لاعدو ولا ظالم بس هالنواف لااشوف خشتة ان شفتة رجعت البيت
سارة وهي تتكلم على نفسها::انتي بس تعالي وبتشوفين شغلك معي انتي وياه اصلا انا ابيك تشوفينة ويشوفك
ريم::خير وش تقولين لنفسك استجنيتي
سارة::لا مافية شئ اقول على هالخشم
((سارة وام سارة وابوها يتمنون ريم لنواف ونواف لريم لانهم لايقين على بعض وهم عارفين البنت من صغرها ويحبونها كلهم وكمان البنت حبوبة وحلوة ماتتعوض))
في بيت ابو نواف فيصل الاحمد
سارة تدخل البيت من المدرسة::السلام عليكم وترمي بروحها على الكنبة
نواف::وعليكم السلام شوي شوي على الكنبة اشتكت منك ياحرام
سارة::تكفى عاد انت ماحد طلب رايك..الا نواف كم باقيلك وتخلص دراسة
نواف::باقيلي سنتينغي هذي السنة
سارة::حلو يعني يمديلي اظبطكم
نواف::هية انتيوش تخربطين تظبطين من
سارة::لا ولاشئ اقصد اظبط شغلي تعرف انا ثالث الحين الايمة عزمتي ام حمد انا قلت لريم ويوم قالت ريم ناظرت نواف
نواف من سمع طاري ريم::وععع مادام ريم هنا بتخرب عزيمتي
ام نواف::حرام عليك ياوليدي ماسوت لك البنت شئ البنت حبوبة وحلوة وصراحة انا ودي انها تكون من نصيبك بس انت الله يهديك
نواف::الله يهدي الجميع بس يمة لو بنات الكون كلهم ينقرضون ومايبقى غير هالريم مااخذتها المغرورة
(اية صح نسيت اعرفكم على نواف نواف الحين عمرة 21 سنة يدرس في امريكيا ادراة اعمال في جامعة اكسفورد باقي لة سنتين ويخلص هو الحين مستوى ثالث وهوشاب وسيموحلو جدا صفاتة صفات امير طويل وابيض عيونة شوي كبار الرموش كثيفة الحاجب خط على العين خشمة طويل ونحيف فمة مرسوم رسم وجسمة ماشاءالله علية رياضي لاهو سمين ولانحيف وايام ماهو صغير يشبة لريم كثير فكانو الناس يوم يشوفونهم يحسبونهم اخوان وهو مثل ماقلنا مايواطنها البنت ماسوتله شئ دووم يقول كذا بس مايدري ليه مايحبها)
سارة::نواف حرام عليك
نواف::لاحرام ولاشئ
سارة::اقول مامنك فايدة الا يمة انا جيعانة ابي غدا
ام نواف::الحين بحط الغدا الساعة 2 بيجي ابوك بروح اجهز الغدا
سارة هنا استغلت غياب امها::نواف بسالك انت ليه ماتحب ريم مع ان البنت ماعمرها سوت لك شئ؟؟
نواف تفاجا من سؤالها اللي هو نفسة دوم يسال حالة هاللسؤال ومو لاقي له اجابة::بس كذا ماحبها من الله
سارة::طيب ليه ابي سبب مقنع البنت حبوبة وطيبة ونعرفها من صغرنا متربية معنا
نواف ويطفش::ياحوووووول مادري ليه فكينا من هالسيرة
في بيت ابوحمد
ريم::يبة يبة
ابو حمد وهو يقرا الجريدة::نعم
ريم::يبة اكلمك انا نزل الجريدة تكفى خمس دقايق بس
وينزل ابو حمد الجريدة ويحطها على الطاولة::وهذي الجريدة نزلناها خير وش تبي الريامي حبيبة ابوها
ريم::فديت ابوها انا بس يبة تدري ان ماباقي غير شهر واخلص دراسة عاد ابيك لاهنت تحجز لنا على مكة على طول اول مانقضي اختبارات علشان ابي ارتاح هناك عند الحرم
ابوحمدبابتسامة مفتخر ببنتة اللي عرف يربيها::الف طلب مثل هالطلب انتي بس خلصي ومايصير خاطرك الا طيب عاد ابي النسبة ترفع الراس مثل كل سنة
تقوم ريم وهي فرحانة يتحب راس ابوها::ربي لايحرمني منك يالغالي وعلى هالخشم ان شاءالله

07-25-2008, 03:59 AM

وتروح ريم غرفتها وكانت الساعة 7 المغرب صلت المغرب وراحت فتحت النت وفتحت على المنتدى والماسنجر تبي تشوف قصايدها اللي نزلتهم بالمنتدى والرد عليهم ريم تكتب شعر ومايدري عنها الا سارة بس واخوها حمد لانه احيان يصححلها الاخطاء اللي فيهم
شوي تدخل عليها نورة اللي تعرفت عليها بالمنتدى وارتاحتلها
>&*دموع الليل*&<
هلا وغلا بالريامي
@شووق العيوون@
هلا فيك
>&*دموع الليل*&<
صراحة ريم قصيدتك اللي نزلتيها بالمنتدى حلوة وقوية بعد
@شووق العيوون@
عيونك الحلوة نورة
>&*دموع الليل*&<
تدرين ريم من زمان ودي اتعرف عليك والحمدالله هذا انا تعرفت عاد اتمنى تقبليني اخت لك
@شووق العيوون@
ولو يالغالية حتى انا
>&*دموع الليل*&<
بعرفك علي زين انا اسمي نورة ادرس في ثالث ثانوي علمي ساكنة في الرياض
@شووق العيوون@
ههههه شف الصدفة مثلي بس اللي غير الاسم
>&*دموع الليل*&<
جد وناسة اجل بنفهم على بعض بسرعة
@شووق العيوون@
تدرين نورة انا مرتاحتلك كثير
>&*دموع الليل*&<
تسلمين والله من طيب اصلك
>&*دموع الليل*&<
انا في اول العطلة بروح مكة
@شووق العيوون@
ههههههههههههه
>&*دموع الليل*&<
وش فيك تضحكين ماقلت شئ يضحك
@شووق العيوون@
اضحك لاني حتى انا بروح مكة اقول وش رايك اشوفك هناك ومنها اسوي نفسي عرفتك صدفة بالحرم واعرفك على الوالدة
>&*دموع الليل*&<
والله فكرة حلوة حتى نفرب من بعض اكثر
@شووق العيوون@
بس انتي متى مارحتي اتصلي علي وخبريني وانا بظبط خطة ماتخرش المية
>&*دموع الليل*&<
هههههههههههههه حلوة ماتخرش المية بنشوف خططك يام الافكار
@شووق العيوون@
عاد انا استاذن بروح اذاكر كم كلمة وبنام لاني حيل تعبانة
>&*دموع الليل*&<
اوكي فمان الله
@شووق العيون@
فمان الكريم

في بيت سارة وبالتحديد في غرفتها كانت هناك وعندها نواف جالسة تسولف هي وياة عن دراستة ووش سوا في امريكيا
سارة::اقوول نواف اعترف كم حبيت شقرا هناك
نواف::وععع من زينهم
سارة::معقولة ولا وحدة
نواف وهو متنرفز::سارة وش هالكلام انتي تعرفيني زين انا بحياتي ماكلمت بنات ومغازل تبيني هناك اقعد اطالع بنات انا رايح ادرس وبس
سارة::طيب طيب كلتني بقشوري بس بختبرك بس تدري نيال اللي بتاخذها وياليت تكون اللي ببالي
نواف:: الا هالخبلة مستحيل اخذها لو تنطبق السماء على الارض
ماكمل نواف كلامة الا برن جوال سارة وتطالع الشاشة وتقعد تضحك
نواف::بسم الله عليك يااختي وش فيك تضحكين لايكون انهبلتي من يوم جبنا سيرة الخبلة
سارة::انت طالع الاسم اللي بالشاشة وتدري ليه اضحك
وتورية الجوال
نواف::الريامي ياحوول ذي مامدانا جبنا سيرتها الا هي متصلة زين الي مانطت مع الباب
سارة تضحك وترد وتحطة على السبيكر ونواف جا ينحاش بس مسكتة سارة وقعدتة على السرير وحطت اصبعها على فمة بمعنى اسمع ولا تتكلم:.....
ريم::وجع وتضحكين انتي وهالوجة ماتستحين على وجهك ياللي فيك مافيك ناقعتني صارلي ساعة اتصل وماتردين لو اني جاية بيتكم مانقعتيني كذا
سارة وهي كاتمة الضحكة::هدي يابنت الحلال بس كنت عند نواف وجوالي بالغرفة من يوم ماسمعته جيت
ريم::وععع وانتي لك ارض تجلسين مع ثقيل الدم هذا
سارة::فديت اخوي مافي اخف من دمة وسالفة العسل بس كنت اساله عن جيني
هنا نواف نقع من الضحك لانة عرف اختة تبي تشوف ريم وش تقول حتى هو صار عندة فضول يبي يشوف ردة فعلها هو صدق كان يتهاوش معها بس اذا احد من الحارة تعدى عليها او بنات خالتة لانهم كانو مايحبونها كان يدافع عنها
ريم وبانفعال::ومن جيني هذي
سارة::اعصابك شوي شوي وانتي ليه تبين تعرفينها مو نواف مايهمك
ريم:: اية صح مايهمني ماه داعي اعرف خلية يعرف جيني وكرستين بعد انا قايلة ان اخوك سوالف
سارة وهي ماسكة روحها ماتبي تضحك::لا مانبي كرستين بس نبي جيني فديتها هذي ان شاءالله بنزوجه اياها بصراحة انا شفت صورها كثير حلوة وحبوبة وكلمتها قبل شوي
ريم::ماشاءالله عليك مبسوطة انتي ووجهك وتتفدين بعد وتقلد صوت سارة باستهزاء كلمتها قبل شوي اقول مالت عليك
سارة::هدي يابنت الحلال عادي مافيها شئ مرة اخوي
ريم وبعد ماعصبت::اقول فكيني منك ومن سيرة اخوك خلية لجيني حبيبتة نسيتيني لية انا متصلة اية صح بسالك تروحين معي بكرة بقص شعري عقدني صراحة
وهنا نواف نط يانفعال::لا لا لاتقصينة
>نواف يحب الشعر الطويل وخاصة شعر ريم ايام ماكنو صغار كانت كل ماتبي تغايضة تقولة بقص شعري وهو يسكت عنها<
ريم::سارة من عندك اللي يقول لاتقصينة
سارة انحرجت من نواف وقانت تناظرة بعيونها وهو انحرج لان لو بتدري ريم انه سمعها بتزعل كثير::هلا هاه مافي احد بس التلفزيون
ريم::علينا ياسارة تلفزيون ويقول لاتقصنة سارة نبرة الصوت مو غريبة علي اعرفها زين هذا نواف صح
سارة هنا تورطت عرفت ان مالها مهرب لان ريم طول عمرها معهم وتقدر تميز صوت نواف اللي فية بحة شوي::اية هو توة دخل عندي وسمعني يوم اقولك لية بتقصينة وعلى باله بقص شعري تعرفين نواف يحب الشعر الطويل
ريم عدت السالفة وماعطتها اهمية::عاد هو وش دخلة الملقوف
سارة::اقول ريم امي تناديني على العشاء استاذن انا وياويلك ان قصيتة بقص عمرك ترا
ريم::اوكية يالغالية مابقصة صرتي انتي والزمن علي بس ترا بروح اصبغة
زقفلت السماعة وتنهدت وحمدت ربها ان ريم ماحست بشئ وصدت صوب نواف اللي كان يتسحب يبي يطلع من الغرفة::تعال تعال انت بالله زين عليك اللي سويتة كنت بتفضحني قدام البنت
نواف::وش اسوي تقول بتقص شعرها عاد تعرفين كلش والا شعر ريم الا صح الحين وين وصل
سارة::اااه منك ويقول ماحبها ومستحيل اتزوجها ولاتجيبولي سيرتها
نواف:: الا ماحبها بس شعرها احبة لوين واصل
سارة بغمزة::يالنصااااب شعرها واصل الى نص فخذها
نواف::اكيد حلو
سارة::يانواف انت لو تشوف ريم مابتعرفها الحين حيل تغيرت واحلوت عن قبل
نواف في باله هي من يوم صغيرة حلوة اجل كيف الحين بس مغرورة
وراح نواف لغرفتة وهو يفكر بريم وبمواقفة معها وهو صغير

وبكذا انتهى الجزء الاول اتمنىاشوف ردودكم وتوقعاتكم ورايكم بداية بالقصة

باقي يومين على الاربعا والعزيمة وش بيصير فيها؟؟
نظرة ريم لنواف بعد كذبة سارة عليها بسالفة جيني؟؟
هل بتشوفة وتسلم علية والا كالعادة تتهرب من شوفتة؟؟
نواف هل بتتغير نظرة من ناحية ريم والا بتظل المغرورة بنظرة؟؟

كل هذا بتعرفونة بالجزء الثاني

وبعد ما اشوف تفاعلكم مع القصه

07-26-2008, 01:19 PM

موضوع في غاية
الروعة كروعة
حضورك وتميزك
تقبل مروري المتواضع
دمت

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
روايه احلى ماخلق ربي	الوجدان	القصص والروايات	1	07-24-2008 03:06 PM
موتضيع مضحة..................	...لمسة جرووح...	الوناسه والضحك	2	03-27-2008 09:35 PM
شتات نفس وهلوستها .... روايه سعوديه روعه وجريئة	دلــع طفــلــه	القصص والروايات	8	03-25-2008 02:35 PM
فندق الحب ==صور روعه=	حنين الذكريات	مكتبة الصورPhoto	7	02-10-2008 05:59 PM
روايه حزينه	بنت السعوديه	القصص والروايات	6	08-03-2007 04:19 AM