>> ندخل بالموضوع دوغري
اللووو سعد كيف حالك ان شالله بخير وكيف شهر العسل يابو ريحه بصل !
المتزوج سعد : هلاا والله بخير اخبارك انت عساك طيب !
العزوبي:وينك فيه ابي اقابلك ونسولف .
المتزوج: ابد في البيت انت وينك الحين ؟
العزوبي: رايح لمقهى ابو هيثم اشيش.
المتزوج:طيب نصف ساعه وانا عندك .
العزوبي < ينتظر الين جاء المتزوج سعد
:::: ودار بينهم هذا الحديث
العزوبي :ايه يالمتزوج دخلت القفص الذهبي ياحضك تاكل من طبخ البيت
وملابسك تتغسل .
المتزوج: الحمدالله تزوجنا وملابسي تتغسل وابلع من اكل البيت
بس ياخي الوضع تغير علي 180 درجه!
العزوبي :افا وشلون وش الي تغير؟
المتزوج: ياخي اول اطلع للبر معك ومع الربع اي وقت واي مكان
وحريه مطلقه مثل مانت عارف واذا ابي اشتري ملابس لي اقرب محل ملابس في اي شارع او اي حي القاها على طول والثياب وملابسي ماتكلف مئتين ريال.
العزوبي: طيب هذا عارفينه وش المشكله ؟
المتزوج: الحين ياخي لازم احسب حساب الزوجه الف ريال اقل شي
فستان قيمته اقل شي 500 ريال وملابس واكسسوارات بـ500 ريال هذا اقل شيء نسيت اقولك العيد جاي ولازم كوافيرا والكوافيرا للحين مادري كم بتاخذ الزواج صرفيه غير طبيعيه .. صحيح انه زواج واستقرار
بس ياخي تجيني ضيقه بالصدر كل ماجات مناسبه منها الاعياد
لا وشهر رمضان االاغراض ياطويل العمر كلفتني فول 300 ريال كاقل تقدير
العزوبي : والله ياخي الزواج كذا وش نسوي بس تبي الصدق كلامك يخوف
تعال بسالك كم اخذت قرض من البنك وكم تعطيهم بالشهر ؟
المتزوج: ياخي انت تسال اساله تسد النفس باقولك .. بما ان راتبي 5000 ريال ماعطوني الا خمسه وستون الف ريال والقسط الشهري 1400 ريال
يعني يبقى من الراتب 3600 ريال وقسط للشقه شهريا الف ريال يعني مع قسط البنك وقسط الشقه يطلع راتبي الفين واربعمئه ريال .
العزوبي : طيب فواتير كهرباء وتلفونات اووف وش ذاا !!!
المتزوج: والله ياخي وش نسوي هذا هو الزواج وضريبته المعروفه
ونصيحه مني لك ظبط امورك مادام انك عزوبي وجمع رويتبك .
العزوبي : مثل مانت عارف راتبي 4500 ريال منها قسط للسياره 1200 ريال وذا الغريفه الي فوق محطه البنزين الي على طريق القصيم بثمانمئه ريال شهريا يعني يصير راتبي صافي 2500 ريال فقط لاغير.
المتزوج : الله يعينك ياخي شوف تبي الصدق والحل تزوج مسيار !
العزوبي < منذهل: زواج مسيارانت وش تقول والله زين بس وين القاهم
العزوبي < قام يوزع ابتسامات ومستحي
المتزوج : ترى فيه شيوخ يدلونك او روح اقرب مستشفى تلقى لك ممرضه سعوديه او دكتوره !
العزوبي : ياخي عمري 26 يعني فطفوط الدكتوره القى عمرها فوق 30 سنه
والممرضه مادري بس وضعها دايم تقابل رجال هي والدكتوره وبعدين اي وقت يسافرون برى المملكه سمعت با القصص يسافرون ويسحبون سيفون على ازواجهم بس ماينلامون متزوجين مسيار حتى الي متزوجها مسيار ماله وجهه يردهم عن السفر بيقولون له طلقنا ومشاكل تصير ماله اول ولا أخر.
المتزوج: يارجال دور وبتلقى بنت الحلال الي تظبط امورك
تبي الاجابه والاختصار لا تتزوج مادام وضعك كذا قسط سياره وقسط غريفه خلك على قردك لا يجيك اقرد منه
واذا بعد تزوجت راتبك ذا مايوكل عيش مادام كل شي غالي مواد غذائيه وشقق اسعارها غاليه والحكومه غير مباليه لا وازيدك من الشعر بيت
الذهب الي تبي تشتريه للزوجه ترى طـــــاق الانمبير
ونصيحه مني لك خلك عزوبي ابرك الين تتسير امورك وشتوف وضعك زين او انتظر الحكومه تصدر قرار بمساعده الشباب من ناحيه زواج او غيره
مع اني اشوف ان فيه مساعدات للشباب بس فهيا واسطات وحب خشوم
من بنك التسليف (التليف) والكلام اكثر بكثير بس مابي اعكر مزاجك يالعزوبي
العزوبي : الله يعين بس وش نسوي ان شالله الامور تتيسر واذا تعرف وحده مستقيمه تبي زواج مسيار تكفى لا تبخل علينا .
المتزوج : ان شالله ابشر
المتزوج يقول في نفسه: اذا لقيت انا اول واحد باخذها هـع هـع.
المتزوج :طيب توصي بشي انني سوف اذهب.
العزوبي :سلامتك يالمتزوج
العزوبي يقول في نفسه: الحمدالله ماني متزوج ولا كان الحين انواع التحقيق في البيت وخساير في ذا الاسواق هـع هـع.
:::::::::::::::::::::::::::::::::::::::: :::::::::: :::::::::::::::
ان شالله اعجبتكم القصه يالله في حلقه قادمه لنعيش احوال شبابنا
من ذوي الطبقه الكادحه وليسوا المخمليه
حوار بين عزوبي ومتزوج 
العرض العادي
