المدينة الترفهية بالكويت .....!!.!..!

10-19-2007, 02:10 AM

بسم الله الرحمن الرحيم

من زمان الواحد ماطق له فرّه على المرافق الترفيهيه والسياحيه في الكويت .. هالمره طق براس العائله الكريمه ان يذهبوا الى المدينه الترفيهيه فعرضوا علي الذهاب معهم ورحت وياهم ... فتعالوا انشوف شنو اكو ماكو في المدينه الترفيهيه

اول شي خل نتكلم عن المدينه الترفيهيه ... ونقول تقع المدينه الترفيهيه في منطقة الدوحه في دولة الكويت الحبيبه وتعتبر المدينه الترفيهيه من اكبر المدن الترفيهيه في الشرق الاوسط حيث تم افتتاحها على ماأظن سنة 84

ان ماخاب ظني

المهم الحين تعالوا وخلونا اندش داخل

هني بداية الدخول للترفيهيه ويشاهد الناس كل واحد رايح بطريج يبي يلعب اللعبه اللي طاقه براسه

طبعا ماادري ليش العالم اللي قاعد اشوفهم اول مايدشون الترفيهيه ياخذون يمين على طول صوب قطار الموت وربعه مناك ... وتعالوا الحين نشوف شنو اكو من العاب هناك

هذي ماعرف اسمها اللعبه الصراحه بس فكرتها مثل المركبات الصاروخيه كل مركبه اتشيل اثنين وتقعد تصعد تصعد تصعد فووووق وبعدين عاد تقعد اتلف فيك يمين ويسار وفوق وتحت اتخضك خض لييييييين اتطلع البلاوي اللي فيك اللهم ياساتر

هني قاعده تفتر بسرعتها القصوى وهي معلقه فوق ... طبعا وانت قاعد تحت اتطالع الاوادم اخذ صراخ من هالبنات ماله اول ولاتالي ... والا اللي تلاقيه قاعد يغني اغاني مادري من وين يايبها يعني موهامه الموضوع كلش واخر شي لما ينزل موعارف وين دربه صاير ^_^ من الاغاني المغناة واللي سمعتها سمع اذوني محد قالي اغنية الفنان الكبير يوسف شافي لوووووول يامال فرقا العين ^_^ واغنية واحد مادري منو بداية الاغنيه تقول كلماتها سواد الليل جلاّب الهموم لوووووووووووووووول ..... واحلى مافي الموضوع وانت قاعد تحت اتابع الوضع شنو اتشوف قاعد يطيح عليك من فوق ؟؟؟؟ اتلاقي شباصات طايحه من شعور البنات ... ملفع امتدندل ... اجناط ... بلاوي زرقه ... خرده فلوس ... أشياء أخرى ^_^ لااستطيع ان اذكرها

**************************************

انخلص من هاللعبه ونروح حق لعبه يديده توهم امسوينها اسمها البرق ... وهذي فكرتها عربه على مااعتقد تشيل 24 شخص مربوطين من فوق والريول بالهواء الطلق وتقعد تفتر فيك بكل قصوتها على الحديد المعلق فوق راسك وعاد اخذ تخرع وصراخ من هالاوادم اللي مايخلونك اتركز بشي ابنوب ابنوب ^_^

هني بداية تحرك اللعبه والصعود الى القمه ... والتأهب الى الوقوع مره اخرى في الوادي المقابل للعبه

احدى الانحناءات في اللعبه اللي اتخلي اريولك فوق وراسك تحت

مشكلة هاللعبه كل ماتبي اتركز في الطريج وانت تطالع جدامك وخصوصا اللي يقعدون اول سطره يمكنهم مشاهدة كل شي بوضوح ^_^ كل مااتركز اتحس راسك بيطق بالحديد الملفلف فوق راسك وانت تقعد اتجندس واهوه ماراح يحوشك بس جذي شعور خايس

**************************************

انخلص من لعبة البرق انروح الحين حق قطار الموت وهذي تقريبا نفس فكرة البرق لكن على قطار يعني اريولك مو بالهواء الطلق

هني بداية انطلاق اللعبهوالاستعداد للصعود الى القمه ومن ثم النزول مره اخرى

هني القطار قام يصعد يصعد يصعد عشان وررررررررر مره ثانيه بالارض

سكة قطار الموت والانحناءات اللي فيه ...

طبعا اكو العاب وايد غير هذيل بس هذيل اللي قدرنا عليهم ... خلونا الحين نروح نفتر شويه ونتمشى

ونوقف عند هالركن ^_^

هذا سلمكم الله مكان التجمع للشباب ... اي عاد سألوني ليش متيمعين هني ؟؟

انا اقولكم هني داخل اكو مكان للرقص ويتم تصوير الفيديو كليب اللي تبي ترقص عليه ومن بعد مايصورونك انت ياللي داخل تبي ترقص يتم عرض الفيديو كليب على شاشة التلفزيون الموضوعه في الفاترينا وهات يامشاهد وشوف واضحك على هالاوادم ^_^ .... وانا اقول ليش الكليبات هالايام منحطه اثاري بدايتها جذي ... اتلاقي كل وحده او واحد من الفنانين اللي توهم طالعين علينا هالايام في الفضائيات جرب نفس العمليه صوّر نفسه في مدينة ملاهي او شي من هالقبيل واعجبته الفكره اللي يسوونها الاخوان اللي واقفين هذيل وقالك بصير مطرب او مطربه ... لاوعاد تلاقيه يحصّل واحد يجذب عليه بنفس اللحظه بيييييييييه عاد شيفكنا ؟؟؟؟ يحسب نفسه فلتة زمانه

وعندك واحد كليبب منحط وكتّر الدهنيه وصلحووووووووو

عارضين ازياء ماشاءالله عليهم كل واحد منهم واقف وقفه عجيبه غريبه ... اللي مرفع دشداشته اتقول داش في طين ... واللي متسند على رفيجه ياعمري شنو هالحب اللي بينكم ... واللي يحك راسه اتقول فيه ..... طان طان طان

*********************************

المهم خلونا نمشي شوي ونروح الحين حق لعبه هم ماعرف شنو اسمها

يتبع >>>

10-19-2007, 02:14 AM

اعتقد فكرتها واضحه مايبيلها شي ... اتحمل ركاب من تحت وترفعهم فوق واتخضهم مثل رفيجاتها اللي قبل

هني اصعدت فوق والصوره اللي تحت قامت اتخضهم

***********************************

نروح الحين حق هالشي اللي راح نشوفه الحين وهو مركبه دائريه اتشيل ركاب في شكل دائري مثل ماانتوا شايفين .... جيكوا على روس الاوادم اللي قاعدين داخل ^_^

المهم وتبدأ المركبه بالصعود الى اعلى نقطه في المدينه الترفيهيه ليــــــــــــــــــــن توصل الى أن يطيح قلبك ببطنك والعكس صحيح

عاد عقب اتشوف الناس تحتك نمل وانت فوق ^_^ شلون ماتدري ياسبحان الله

هني تصل المركبه الى اعلى نقطه لها

********************************

تعالوا الحين انروح حق رحلة السندباد ... والفكره اهيه تركب مركبه تقعد تمشي فيك في عدة بلدان واماكن واتشوف الرحلات اللي قام فيها سندباد البطل اللي ...لايخاف سندباااااااد مهما تبعد الاخطار ويبعد عن بغداد ^_^

ونمشي داخل هالعالم ونشوف حتّه حتّه

هني هذا ماادري اشقاعد يطبخ .. مادري يسوي سحر والا يحضّر ارواح مايندرى عنه حلايا عمامته واذونه المشتـّحه ... واحلى شي الجوتي الوردي المبوّز هذا حق الفناقر زين ترى

وهذيل قاعدين يرحبون فيكم على طريقتهم الخايسه .. بس انا عاجبني لون بشرة ابو دشداشه زرقه شنو اهو برونزي والا حنطاوي والا دخّاني ؟؟؟ مادري شلون قايل ... بس احلى مافيه عيونه ماشاءالله اتقط الطير من السما ... ابو عيون فتانه ابو عيون فتانه

تعالوا انشوف هالعالم المرعب من رحلة السندباد نياهاهاهاهاهاهاهاهاهاهاها

مسكين هذا ليش اميوعينه ؟؟؟ شنو ماكو أكل تعطونه ؟؟ يبا الوجبه بره على دينار مالت الاطفال بلا هالقعده جذي طول الوقت امفصخ

ياحيّه ياام راسين طبي بجدرهم قرصيلي اهل البيت خلي ولدهم ... ولك يمكن منعوه هله ويمكن منعوه هله اليوم له يومين مامر عليّه امنين اجيبه امنين يصعب عليّه

يتبع >>>>

10-19-2007, 02:16 AM

هههههههههههههههههه هذا المارد ها ؟؟؟؟؟

وخاطف له وحده صغيرونه ترتدي جلابيه حمراء اللون وطرحه عنابيه غامجه ذات عيون وساع وحلج امبطل 24 ساعه ماينصك يرجى من يعلم عنها اي شئ ان لايتصل فينا ولانبي نشوف رقمه طالع عندنا خير شر ^_^

هذول اشيبون بعد ؟؟؟ الحين انتوا ريالكم وينه ؟؟؟

خلونا انروح الحين الى عالم غير العالم المرعب في رحلة السندباد

معاريس ماشاءالله عليهم هالفيله ... خوش بشت هذا الازرق عجيب حده مده

لوحه معبره من داخل رحلة السندباد تحكي الواقع المرير اللي قاعد يصير في مسلسلاتنا البطيخيه اللي في الوقت الحاضر

***********************

خلصنا من رحلة السندباد خل نروح نتعشى شرايكم ؟؟ اكيد يعتوا

عاد ماشاءالله المدينه الترفيهيه المطاعم فيها يمكن اكثر من الالعاب وين ماتروح والا مطعم بويهك يعني ماتتوهق كلش اذا طقك اليوع ... لاوبعد في محلات للتسوق وكل شي في هالمدينه ترى انصحكم فيها ياللي بتزورون الكويت اول شي يطق بروسكم مروا على المدينه الترفيهيه اكيد راح تستانسون ^_^

أحد المطاعم المبني على الطريقه الصينيه .. ^_^

الحين خلونا نروح حق رحله الى العالم الاوربي والسيارات الاوربيه القديمه وانشوف معالم اوروبا ^_^

هني نقطة البدايه تركب سياره اوربيه من الطراز القديم وتقعد تفتر بين العواصم الاوربيه

هذا مادري وين في اوربا بس اهوه مكتوب عليه الصراحه وانا ماشفت وين هالمكان ^_^

احدى القلاع الاوربيه اللي ماعرفها ^_^ مو خبري بالوالد وصل بس لندن وباريس غيره ماراح والا جان قالي الله يهديه

وليييييييييه هذا شنو بعد ؟؟؟ يبا انتوا روحوا واقروا وراح تعرفون وين هالاماكن انا كنت منهمك بالتصوير وهاللقطه من فوق احد الجسور في العالم الاوربي بس اعتقد اعتقد والله اعلم انها من دولة اليونان

هههههههههههه هذا اعرفه عاد ساعة بيج بن في لندن هىهىهىهىهىهى اخيرا عرفنا شي ؟؟

وهذي باريس هههههههههههه لا اسم الله علي اعرف والله ماشاءالله تبارك الرحمن

حاضرين يبا مانبي نعقدكم يبا احنا انعرف بس مانقول

الحين نطلع من العالم الاوربي ونروح نفتر شوي بالمدينه الترفيهيه ونشوف بعض الالعاب المخصصه للاطفال

لعبة الخيول

وهني هالمكان مثل المسابقات واذا فزت يعطونك القاري المعلق فوق ههههههه او اي لعبه اهمه يختارونها لك وغصب عليك تاخذها

يتبع >>>>

10-19-2007, 02:18 AM

خووووووووش قاري الصراحه .... ابيه حق الشقيق عشان يروح فيه الدوام يريّح الوحش اللي عنده

راح تشوفون ان شاءالله بعدين سيارة الشقيق الوحش المقصوده في الموضوع بعد ماسوالها صنفره وصبغها

*********************************

خلونا الحين نروح حق لعبة الجندول الاسترالي وهي عباره عن جذع شجره محفور بالوسط ويمشي هالجذع في وسط الانهر الاستراليه ويصعد وينزل ويمشي فوووق يكون مثل المعلق وبعدين ينزل في الشلالات المائيه وعاد هات من الترجخ بالماي ... وخلونا نشوف الرحله بالصور يالله تعالوا

لقطه لرحلة الجندول الاسترالي ويبدوا الطريق وعرا

احدى الشلالات المائيه اللي راح يطب فيها جذع الشجره اللي شايل الناس .. يبدوا المكان هادئا نوعا ما ولكن بعد قليل راح اتصير لويه ^_^

جان يطب بالماي طششششششششش عاد الحين عقب ماتنزل شوف ملابسك شنو صار فيها ^_^

بس نصيحه للكل اللي يبي يركب لما ايي الجندول يبي يطب بالشلال خل كل واحد يتحكم في شكله واهوه طااااب لأنه اكو كاميرات اتصورك وراح اتطلع تعابير ويهك او حركاتك وانت ماتدري هىهىهىهى

مثل ماراح نشوف الحين بالصور التاليه

الصوره الاولى : الأخ اللي ورى رافع ايدينه اتقول جونغر الحبيب ... واللي جدام مسكين عاض على سنونه حيييييل وطاق اللطمه الأخ

الصوره الثانيه : هههههههه حلجك يالحبيب ليش ليش الصرااخ عاد ترى الدنيا ماتسوى والله يامعود

*****************

خلصنا الحين من الجندول خلونا نروح حق لعبة المنخل

جيكوا على بتيته القوي اللي واقف بوسط اللعبه اوكي ؟؟؟

على آخر شي وين راح اللي كان واقف البتيته ؟؟؟

والا متكرفس الحبيب بوسط المنخل هههههههههه

وبجذي انتهت رحلتنا للمدينه الترفيهيه ان شاءالله اتكونون استمتعتوا ويانا يالله عاد صلوح ملوح اللي يدل بيته يروح

هذى مدينة الترفهية بدولة الكويت الحبيبة
اتمنا تروحون واتشوفونها صدقونى بتستانسووووون وايد

10-20-2007, 02:23 AM

مشكوره اختي بصراحه ع الصور الكويت حلووووووووووووووه

ولا مرة جيت الكويت

وتقبلي مروري

10-20-2007, 02:27 AM

العفواااا

إن شاء الله تجي الكويت واي استفساؤ عن الكويت انا تحت امرك

شكــــــــــــراااا لمرورك

10-20-2007, 03:06 AM

رووووعه من جد

يسلمووووووووو

تقبلي مروري

10-20-2007, 05:35 AM