مساهمة منا في طرح المزيد من فرص العمل أمام الشباب العاطلين وخصوصا السحالي .. فقد تقرر إنشاء فرقة نسائية شعبية وهي ما يسمى بفرقة طقاقات
سيتم التسجيل والفرز وإجراء البروفات في ظرف أسبوع واحد .. موسم العروس والزواجات <<وش الفرق>> بدا وحنا ما بعد جهزنا .. يبغى لنا نقول بالموضوع بسرعه جلدي جلدي .. علشان نستغل الموسم ذا الشهرين قبل رمضان الله يشرفه
المؤهلات المطلوبه
المؤهل العلمي تخلونه في البيت قبل تجون لا تنسون .. واللي عندها حق البرواز وإلا تتسلف وتبروز المؤهل وتعلقه بأقرب جدار إن حصل في بيتهم وإلا إن شاالله في بيت توه يبنى
أهم شي موب الأخلاق ولكن العربجه إن حصلت يكون أفضل .. إلا في اللي تحاسب وتجمع القطه والنقطه على الأقل تموه إنها أخلاق لين تتلايم على الفلوس بعدين تتصرف بطبيعتها العربجيه أو الناعمه
يجب تحديد نوعية الهواية أو وش التخصص حسب الإمكانيات والمواهب اللي موجوده عند المتقدمه ..
يعني اللي تحب تعزف واللي تحب تغني واللي تحب ترد وتصير ضمن ما يسمى (الكورال) اللي هم المجموعه اللي يدربون دمجهم ويرددون زي الببغاء بعد المطربه الرئيسيه ..
وللتوضيح .. ترى شغلة ذا المجموعه موب يجيبون كور <<عارف إن بعضهن متنحه بتقرا كورال وتفهم أول ثلاث حروف على بالها مسويه اختصار للكلمه>> ..
وكذلك هناك تخصصين مهمين لكن أكثر شي .. للكديش من المتقدمات .. حيث إن فيه اللي ضمن مجموعة تجهيز المعدات ومجموعة التفاهم و (تهجيد) العالم وضبط النظام يعني باديات قاردات <<قصده بديقاردات>> يعني حارسات خاصات موب حارسات عماير
اللي ودها تعزف وتنظم لمجموعة العزف لازم تكون يدينها صغيره أو أقصى شي متوسطة الحجم وتناسب المعدات <<وين حفريات>> الموسيقيه اللي بنتسلفها لين الله يفرجها وتضرب معنا ويصير عندنا دراهم ونشتري أورقاتنا <<جمع أورج>> وكمنجاتنا وسكسفوناتنا <<لزوم البلوز ...
يعني اللي يديها كبيره وكنها عتله لا يطري على أمها تكتب (عزف) في خانة الهوايه في (الابلكيشن) حقنا ما ناقصنا وحده تخرب أبو جد المعدات وإلا كل شوي شاقتن لها طار من قو ما تدبجه على بالها تطق باب جيرانهم ومحد فتح لها .. وإلا في كل حفله ينط وتر من ذا الأوتار بعين اللي بجنبها من طول الأصابع اللي كنها أنابيب مختبر ..
يعني بالعربي نحتاج يدين حنينه عشان حتى العزف يطلع حنين <<لا يهمونك مفارقهم الحنان
اللي تحب تغني .. سيتم إجراء اختبار صوت ضمن برنامجنا (صوبرطقاقه) <<على وزن سوبرستار>> ومن الشروط إن صوتها ما يكون زين بالحيل ..
يفضل يكون نشاز بدرجه مقبوله بحيث إنه ما يمشي مع الموسيقى بأي حال من الأحوال ولا تنفع معه البروفات حتى لو في سطح ..
لأن اللي صوتها زين مره ما نقدر نسميها طقاقه <<يعني إحراج وإلا وش قصدك؟
اللي تحب ما تجيب كور <<قصده تصير مع الكورال>> وتردد مع الخيل يا شقرا .. عادي أي طبقة صوت مقبوله .. أهم شي إن أصوات مجموعة الكورال يكون كل واحد بجهه ..
ما يكونون بنفس التووون (النغمه) وإنما أصوات متضاده يعني كل وحده تغني مع المجموعه بس لوحدها <<وين يا سعيد صالح>> يعني ببساطه اللي يسمعهم يحس إنه داخل سوق صجه ولجه وما يدري من اللي يتكلم
واللي صوتها ما يساعدها تبتسم وتفتح كشرتها على الآخر وتدرعم تصفيق معهم معهم عليهم عليهم .. أهم شي المشاركه والتفاعل <<وين داخلين موضوع بالمنتدى
مجموعة تجهيز المعدات .. وهي أول مجموعه من الكدايش اللي ما يجتازون امتحان القبول سواء لقلة التصويت أو بمزاج اللجنه <<أجل ليش حاطين اختبار>> يكون دورها ..
تحميل وتنزيل المعدات والطبول والطيران من وإلى السياره .. الونيت حاليا .. الجمس مستقبلا (إذا مشى سوق الفرقه) .. والهامر فيما بعد (إذا ضربت معنا واشتهرنا ودخلنا ظهر <<بدال عصر>> الاحتراف بقوه) ..
وإذا عاد فسقنا مره وصرنا نلعب بالفلوس لعب .. أنا بأكشخ ببانيو راما والفرقه بأجيب لهم سطحه
كما تقوم هذه المجموعه بتشبيك الاجهزه الكهربائيه وليس الأصابع
وأيضا التشييك على مكبرات الصوت والتأكد من أنها تعمل بالشكل المطلوب .. بس بدون ما يقعدون يجربون أصواتهم .. ويبدا الاستهبال .. الو الو واحد ثنين ثلاثه .. واحد ثنين ثلاثه .. ما حنا ناقصين يطردونا أهل العرس أو الحفله قبل نبدا ..
ولازم يكون هناك حذر في توصيل المعدات بالكرهب <<غير الكهربا >> لأن أي وحده بتفهى وتشبك جهاز وهي تسولف في فيش 220 والجهاز 110 وتحرقه .. تتأكد إننا بنشبك السلك في عرادتها لين تدخن وتطلع ريحة الشوي
مع العلم إن أغلب معداتنا على بطاريات شحن مسبق بس بدون تكليم .. يعني من باب الاحتياط لو يتعاقدون معنا أهل استراحه ما وصلها الكهرب والا نسوي حفله في مخيم بالبر << ناوين على الدشره قبل يبدون
أما مجموعة التفاهم فتسنتر كل وحده قبل بدء الحفله بعدة ساعات .. يعني من العصر <<وين مباراة>> وذلك حتى لا يعبث أحد من مبزرة العازمين والمعازيم في المعدات
أو يكببون مويه على المسرح أو المنصه وبعدين نتوهق باللي بيرقصن كل شوي زالقتن علينا وحده وهي تردح ساعتها نحلم إنها بتنقط ..
لكن من المؤكد أنها ستدعي علينا وتعتبرنا وجيه نحس <<عادي كلامها في محله>> وحنا تونا ببداية الطريق <<أحلى يا ناشئين>> وإذا كانت ملوسنه وما تستحي بتلزخنا بكم شتيمه على كم سبه ولعنه لين يتشقق إبليس من كلامها
وعند بدء الحفله وبداية الهيصه والنشاز والقرقعه .. وحين يحمى الوطيس وتلعلع (تزغرد) الملوسنات .. سواء من الفرقه أو الحاضرات .. وتقرع الطبول وتزيد الحمول على المنصه ويبدا الردح والاستهبال ..
يبدأ العمل الرئيسي لمجموعة التفاهم .. بحيث .. اللي يشوفونها حلوه وبنت نعمه وترقص صح وتبدا تنقط بشكل سخي .. على طول يتم حمايتها وذلك بوضع ساتر بشري بينها وبين الباقيات على المنصه عدا صديقاتها اللي يرقصون معها وذلك عشان محد يدفها والا يضايقها ويعكر جوها
وبرضه اللي يشوفونها ويحسون إنها حرمة تاجر وبتنقط حتى لو إنها خلفه وشينه وترقص على جهه وحده كنها مصفوقه بماصوره على ظهرها ..
وإلا ترقص وكن رجليها كلهن يسار .. عادي .. برضه يتم الاهتمام بها وحمايتها لين تاخذ كفايتها من الردح حتى لو يفضون لها المنصه وإن وصلت إن الفرقه تغني لها .. الله يا زين اللي حضرت وهم يعرفون إنه نصب .. أيضا عادي .. وش اللي يمنع طالما إن ذا الوريقات <<الفلوس>> بتهفهف من شنيطتها
لكن كل شي ورقاصات الاستهبال .. وهي عادة ما تكون مجموعة من البنات اللي ما بعد تزوجوا يحبون يستعرضون في كل عرس قدام الحريم الكبار علشان يخطبونهن لعيالهن واخوانهن
..
هذه المجموعة يتم التعامل معها بصرامه وحزم وتضييق الخناق عليهن .. حيث يتم حدحدتهن لين يطلعن من المنصه ..
لأننا في حفله وليس في استعراض اجسام وإغراء للخطبه .. يبون ينخطبون عليهن الاتصال بمكتبنا للخطابات الذي سيتم افتتاحه قريبا بعد ما ندخل لنا كم قرش ونشتري لنا كم رقم جوال ونوزعه على أعضاء الفرقه منها يحييون الحفلات ومنها يشتغلون خطابات خارج دوام
تعليمات يجب الالتزام بها
أهم شي اللي بتشارك معنا ما تجيب محرم .. مو لشي .. لكن ندري أغلبهن بتجيب لنا واحد عاطل وفاضي بمهنة محرم .. ويستقعد لنا على وحده ونص في الفاضي والمليان .. وين بتروحون وليش تأخرتوا ومن هالكلام اللي ما عندنا وقت نضيعه فيه !!
تعليمات هامة
1) يتم إرسال شهادات دورات الجوجو والكراتين والتوكوندو والكونغ هونج مدري فو .. إلى صنقوق شيطونه بحسب الاختصاص كزعيمة السحالي والباديات قاردات وسيتم اختبار القدرة والتحمل عن طريقها <<على الأقل بنضمن عضلات
2) أما السير الذاتية وهي عباره عن شهادات الخبره السابقه إن وجدت والصور الشخصيه وأرقام الاتصال إلى صنقوق الريم اللعوب من أجل التدقيق والفرز واللي يحالفها الحظ سيتم الاتصال بها <<إفلقوني كانها كلمتكم
3) لابد من تسجيل مقطع صوتي للمتقدمة .. لنتعرف من خلاله على موهبة الأداء عندها .. وأهم شي لا تكون مغنيه المقطع في الحمام (أعزكم الله) لأن كثيرين يقولون إنهم ما يحلى لهم الغناء إلا في الحمام وهذا المكان قد يخدعنا بصوتها وتصير مقلب .. إضافة إلى مقطع مرئي لخشتها إن حصل .. علشان نشوف ردة الفعل عندنا قبل الجمهور
ويتم إرسال هذه المقاطع إلى صنقوق ريحة الورد علشان تتمقل فيهن وتمخمخ على الأصوات لاختيار المناسب منها <<رحنا فيها>> وتختار أيضا الأشكال اللي ما تخلي الفرقه تنطرد من أي صالة أفراح <<شكلها بتتهاوش معهن على اللبس من البدايه
4) بالنسبه لرسوم التسجيل والتقديم على الفرقه وكذلك فلوس التأمين ضد الغير <<أكيد فيه مشاكل>> فيتم ارسالها كاش على صنقوقي أنا <<صاحب المشروع ويتشرط
للاستفسار والهدايا <<لزوم القبول>> يمكنكم التواصل معنا من خلال هذه الصفحه علشان مسألة عدم الانحياد<<يا حبك للفضايح
شعارنا .. لا للواسطه .. نعم للتسليك
مشروعنا للطقاقات .. فأين المتقدمات؟! 
العرض العادي
